ازاي نبتدي نحوش؟
سالي عبدالقادر
لازم اول حاجة نعرف نعملها او نعلمها لاولادنا عشان نبتدي نحوش هي اننا نعرف نفرق بين الرغبات (wants) والاحتياجات (needs)
- طيب ايه الفرق بينهم؟ ونعلم اولادنا يفرقوا بينهم ازاي؟
الاحتياجات هي الحاجة اللي منقدرش نعيش من غيرها، زي الاكل والشرب والمواصلات واللبس وغيره. والرغبات هي الحاجة اللي لو استغنينا عنها حياتنا ممكن متتأثرش او تقف، زي مثلا لعبة غالية، خروجة غالية، iphone 14 مثلا! وهكذا
عشان نعلم الاولاد الصغيرين يفرقوا بينهم، ممكن نلاعبهم لعبة صغيرة. نجيب صور لحاجات ممكن تكون احتياجات او رغبات من على الانترنت او اي كتاب قديم، ونعمل علي اي لوحة او علي تربيزة كبيرة زي السفرة مثلا جزئين، جزء هنحط فيه كلمة احتياجات والثاني كلمة رغبات، وبعد ما نشرح لاولادنا الشرح البسيط اللي شرحناه فوق، نطلب منهم انهم يبتدوا يرتبوا الصور علي حسب هى احتياج او رغبة في الجزء المخصص له، وطبعا احنا معاهم نرشدهم لو اتلخبطوا.
لازم نخلي بالنا من حاجة مهمة، الرغبة ممكن تقلب احتياج من وجهة نظر حد معين لو بقت عادة ميقدرش يستغني عنها، زي للكبار مثلا التعود علي التدخين وعند الاطفال ادمان اللعب بالالكترونيات او حلويات معينة. المرة الجاية ان شاء الله نكمل الخطوات الثانية للتحويش.
